فعالية ما لا تعرفه عن مساحة شقتك!

فعالية ما لا تعرفه عن مساحة شقتك!

 

يعني إيه بند الخدمات؟!

بند الخدمات ده عبارة عن مجموعة من المعايير المختلفة إللي بتحقق منفعة عامة ومشتركة لكل إللي ساكنين في العقار، زي مثلًا مدخل العمارة، مساحة السلالم، الأسانسير، المناور، الجراج... إلخ.

أي صاحب أرض لما بيجي يبني عمارة، بيدخل تكلفة الخدمات دي في التكلفة الإجمالية لبناء العمارة، وبيتم بعدها تقسيمها على عدد الشقق في كل عقار، وده تحت مُسمى "المساحة الإجمالية للشقة أو العقار"، وإلي بالمناسبة بتكون المساحة إلي إنت بتتعاقد عليها.

طب إزاي أقدر أقيس بند الخدمات، وأطلع صافي مساحة الشقة بتاعتي؟!

عشان تقدر تجاوب على السؤال ده، لازم تلتزم بالنظرية دي: "صافي مساحة الشقة = المساحة الإجمالية – مساحة الخدمات".

وممكن تقدر إنك تحدد المساحة دي بطريقة سهلة وبسيطة جدًا، عن طريق إنك تقيس مساحة كل الحجرات، الحمامات، المطبخ، والبلكونات، الطرقات والحوائط الداخلية والخارجية والرقم إلي هيطلعلك في النهاية هو ده صافي المساحة، أما باقي المساحة الإجمالية إلي موجود في عقد الشقة فبيكون هو ده "بند الخدمات".

طب ومساحة الخدمات دي ليها حد أقصى من المساحة الإجمالية للشقة؟ أيوة،  متوسط النسبة حوالي 25%

يعني على أرض الواقع، لو إنت اشتريت شقة مساحتها الإجمالية 160 متر مثلًا، فالمفروض صافي مساحتها الحقيقية ميقلش عن 120 متر "120+40 متر خدمات =160 متر".

المثال إلي فات ده بقى طبقه على مساحة أي شقة، يعني لو المساحة الإجمالية 140 متر، يبقى المفروض الحد الأدنى لصافي المساحة يكون 105 متر.

بند الخدمات ده في الأغلب بيعرض عدد مش قليل من إلي شاريين شقق جديدة للنصب عن طريق أصحاب العمارات، إلي بيلجؤوا إنهم يزودوا في مساحة الخدمات عن 25%، بغرض إنهم يحققوا صافي ربح أكبر.

"إيه ده؟! دي مش المساحة إلي أنا مشتري الشقة عليها"

الصدمة دي أي واحد لسه مشتري شقة وجاي بيقيسها على أرض الواقع ممكن يمر بيها، خاصة وإنه غالبًا هيكتشف إن مساحة شقته الجديدة أقل من المساحة إلي هو متفق عليها وإللي دافع تمنها في العقد إلي موجود بينه وبين صاحب العمارة، وبشكل ممكن يكون كبير أحيانًا.

الموضوع ممكن يجي في بالك الأول إن صاحب العمارة إللي إنت واخد فيها شقتك نصب عليك، ولكن في الحقيقة، وعشان متظلمش حد، الموضوع كله مختصر في حاجة إسمها "بند الخدمات".

المؤشر للتطوير العقاري