homepark

الاستثمار في العقار .. لماذا؟

إنك تشتري عقار ليك دلوقتي ده مش معناه إنك خلاص لقيت السكن اللي هيكون ملكك بس ولكن كمان انت ممكن تكون لقيت الوسيلة المناسبة اللي هتستثمر فيها فلوسك، وتعالى نشوف ازاي!

فبالرغم من مرور مصر بتغيرات سياسية واقتصادية في السنوات الأخيرة إلا أن معدلات الاستثمار العقاري سجلت زيادة في معدلاتها، ففي عام 2001/2002 بلغت قيمة الاستثمارات 7.9 مليار جنيه مصري وفضلت تزيد لغاية ما وصلت لمعدل 31.8 مليار جنيه مصري عامي 2012/2013 بنسبة نمو 27.5%.

ارتفاع معدلات الاستثمار العقاري في السنوات الأخيرة ممكن أننا نرجعه لاتجاه أصحاب الثروات لادخار فلوسهم فيه لأنه بقي الأكثر أمان بالنسبالهم، وده لأن أسعار العقارات في مصر بترتفع بمعدل تقريباً 20% سنوياً، وبعد قرارات البنك المركزي بتعويم الجنيه المصري وتراجع قيمته قدام الدولار وكمان التذبذب في أسعار الدهب والصورة الذهنية السلبية عن البورصة كل دي أسباب خلت من الصعب أن الناس تستثمر ادخاراتهم فيهم.

وعشان تكون عارف فالاستثمار العقاري نوعين الأول هو إما إنك تشتري عقار مبني بالفعل وتجدده مثلا وتبيعه مرة تانية أو إنك تقوم بالليلة من أولها فتشتري أرض وتطورها وتبني عقار عليها.

ولو انت شخص حابب تستثمر الفلوس اللي معاك وخايف من المخاطرة وإن تحويشة العمر تضيع منك، فاحنا النهاردة هنقولك ليه الاستثمار في العقارات ممكن يكون من أفضل الطرق اللي تقدر تحافظ بيها على فلوسك وكمان تقدر تحقق منها العائد اللي انت عايزه، فالعقارات هتوفرلك مثلا:

عائد شهري مضمون: من مميزات الاستثمار العقاري إنه ممكن يوفرلك تحقيق عائد شهري ثابت وده في حالة لو أجرت الوحدات اللي بتمتلكها أيا كان نوعها سواء للأفراد أو المؤسسات، ده غير إن القيمة الإيجارية اللي ممكن تحصل عليها من خلال استثمارك في العقارات، وخاصة لو عقارك كان في مناطق أسعار التأجير فيها مرتفعة، ممكن تتجاوز الفوايد اللي كانت هتجيلك لو كنت حطيت فلوسك في البنك من غير ما تستثمرها.
ممكن تستخدمها كضمان مالي: من أكتر الحاجات اللي ممكن تشجعك على الاستثمار في مجال العقارات هو إنك ممكن تستخدم العقار المملوك ليك في حاجات كتير، أبرزها يمكن هو إنه يكون ضمانة مالية ليك لدى الغير.
فممكن مثلا إذا كنت بتمتلك عقار أو أرض، تقدر تستغله في إنك تحصل منه على تسهيلات مالية زي إنك تاخد قرض من البنك بضمان العقار ده.
مش محتاج تكون خبير: عشان تستثمر فلوسك في العقارات ده مش هيحتاج منك إنك تكون خبير أو عندك معرفة متخصصة في المجال، كتير من الناس اشتروا عقار في البداية عشان يكون مجرد سكن لهم، ولكن مع زيادة قيمته قرروا بعد كده الاستثمار فيه سواء ببعيه أو تأجيره.
استثمار مستقر وآمن: الاستثمار في العقارات يعتبر من أفضل أنواع الاستثمار لأن نسب المخاطرة فيه تكاد تكون معدومة، بالعربي كده هو مثالي ليك لو مكنتش بتتمتع بروح المغامرة والمجازفة أو لو كنت بتستثمر برأس مال صغير، وده لأنه السوق بتاعته هي الأقل تقلب بالنسبة للأنشطة التجارية التانية ده غير إن انخفاض قيمة العقارات عمليا بيكون غير وارد.
تحقيق الأرباح على المدى الطويل: العقارات من أكتر الحاجات اللي ممكن تحققلك أرباح على المدى الطويل بشرط أنك تعرف تختار منطقة واعدة ويكون عليها طلب كتير، وحتى في حالة لو كان العقار القديم فممكن تزود من قيمته من خلال تجديده وطلائه أو حتى تغيير استخدامه أصلا، ده غير إن الاستفادة مش هتكون لك بس وانما لأولادك كمان.
مرونة في الأسعار: لو مثلا قررت تحط في فلوسك في البورصة فأنت مش هتقعد تتفاوض على سعر السهم اللي هتشتريه، وده على عكس العقارات اللي ممكن تتفاوض على السعر سواء في حالة لو كنت هتبيع أو تشتري، ده غير كمان إن ممكن تجيلك فرصة إنك تشتري عقار بأقل من قيمته الفعلية في حالة لو كان صاحبه مضطر يبيعه في أسرع وقت مثلا.
مخزن للقيمة: كلنا شفنا الأزمات اللي تعرض لها المستثمرين خلال الأزمة المالية العالمية أو مع قرار تعويم الجنيه اللي حصل من سنتين في مصر، المستثمرين دول بالرغم من إن ثرواتهم فضلت زي ما هي إلا إن قيمتها الشرائية قلت كتير جدا نتيجة لانخفاض قيمة العملة، وده على عكس العقارات اللي ممكن نعتبرها مخزن للقيمة، بمعنى إن في حالة انخفاض قيمة العملة مثلا هنلاقي إن قيمة العقار السعرية هتزيد وده هيضمنلك إن حتى لو معرفتش تحقق أرباح فأنت مش هتخسر.
الاستفادة من المشاريع الأخرى: انت كمان ممكن تستفيد من المشاريع اللي بتقوم بيها الحكومة أو الشركات العقارية اللي بتطور البنية التحتية للمدينة اللي عقارك موجود فيه، فلو مثلا تم افتتاح طريق أو مطار جديد ده هيزود من قيمة عقارك، فكل ما زادت وسائل الراحة والترفيه في المكان اللي انت فيه كل ما هيرتفع قيمة العقار بتاعك، وبالتالي انت هتستفيد من غير ما تتكلف أي شيء.

الخلاصة هي إنك لو عايز استثمار يجبلك عائد ونسبة المخاطرة فيه قليلة ويفضل محافظ على قيمته ثابتة متتغيرش، فالعقارات هي الطريق اللي لازم تمشي فيه، كل اللي عليك إنك تختار المكان المناسب اللي العقارات فيه هيكون عليها طلب مرتفع، وسواء كانت أرض أو وحدة سكنية أو أرض فبامتلاكك لحاجة منهم اعرف إن فلوسك مضمونة وتمنها هيفضل فيها.