news

مين مننا مش عايز يشتري شقة أحلامه، خاصة لما تلاقي طول مانت ماشي في الشارع إعلانات عن الشقق في كل مكان، بس بتيجي في الآخر وتفكر في الفلوس هتدفعها ازاي، هل تختار تدفع كاش وتخلص من فلوسها مرة واحدة، ولا تدفع بالتقسيط ومتزنقش نفسك ماديا بس طبعا هتفضل شايل همه لغاية ما يخلص؟

الحقيقة إن أي طريقة من دول ليها مزايا وعيوب ولازم تعرفها قبل ما تقرر إنك تشتري شقة سواء كاش أو بالتقسيط، في البوست ده هنعرفك على مزايا وعيوب الكاش والتقسيط لما تقرر تشتري شقتك:

  • مميزات وعيوب الكاش:
  • لو اتكلمنا على الكاش فهو له فوايد كتير، فمثلا فلوسك لما تتحط في شقة أو بيت ممكن تعتبرها نوع من أنواع الاستثمار، وخاصة إن العقارات دلوقتي تعتبر من الاستثمارات الآمنة اللي بتزيد سنويا في مناطق كتير بنسبة 20%.
  • ده غير إن الدفع بالكاش بيبقى غالبا مرتبط بالاستلام الفوري، ودي ميزة كويسة جدا لو كنت بتدور على الاستقرار ليك أنت وأسرتك، أو لما تكون بتغير مكان سكنك عشان يبقى قريب من مكان شغلك فأنت هنا هتعرف تحقق هدفك ده بسرعة.
  • كمان الشقة لما بتكون ملكك من الأول فانت بيبقى عندك الحرية في إنك تعمل فيها اللي انت عايزه، سواء لو حبيت تجدد فيها بالطريقة اللي تعجبك، أو حتى لو قررت تبيعها هتلاقي مشتري ليها بسهولة لأن لا هيكون عليها أقساط ولا مصاريف زيادة.
  • ولو جينا نتكلم على عيوب الدفع بالكاش، فأكبر عيب فيه هو إن لو مبلغ الشقة كبير ممكن تلاقي نفسك بتحط كل السيولة اللي معاك في الشقة، وده ممكن يؤثر معاك لو احتجت الفلوس لأي ظرف طارئ.
  • مميزات وعيوب التقسيط:
  • نيجي بقى للتقسيط واللي بيبقى مفيد في حالة لو المبلغ اللي معاك مش هيكفي تشتري بيه شقة، ففي الحالة دي بتدفع مقدم بسيط وبتقسط الباقي على فترات طويلة سواء بشكل شهري أو سنوي على حسب إمكانياتك ومقدرتك على الدفع.
  • وعلى عكس الكاش، ففي حالة التقسيط انت مش هتحط كل فلوسك في حاجة واحدة، وهايبقى عندك فرصة تشغلها في أي مشروع أو استثمار تاني.
  • وبالرغم من المميزات دي إلا إن في ناس كتير مبتحبش تدفع بالتقسيط بسبب إنه ممكن يفضل مسببلهم قلق وتوتر مع ميعاد كل قسط وبيبقو خايفين ميعرفوش يسددوه.
  • ده غير إن في التقسيط انت عادة مش هاتدفع التمن الحقيقي للشقة وده بسبب الفوايد اللي بتزيد كل ما مدة التقسيط بتزيد.
  • ومن أبرز عيوب التقسيط في الشقق كمان إنك لو حبيت لأي سبب تبيع شقتك أو العقار بتاعك، بيكون من الصعب في الحالة دي إنك تلاقي مشتري، لأن محدش بيحب يشتري حاجة وعليها أقساط لسه متدفعش، وحتى لو لقيت فهتلاقيه بينزل من سعر الشقة جدا.
  • التقسيط كمان ممكن يدخلك في دوامة إنك تشتري حاجات كتير في وقت واحد لأنك بتحس إن المقدم بسيط، بس بعد كده كل الأقساط دي هتتراكم عليك في النهاية وممكن تلاقي نفسك مش قادر تدفع.

 

 

المؤشر للتطوير العقاري