news

مصاريف اضافية عند شراء العقار

عملية البحث عن بيت عشان تشتريه بتكون حاجة صعبة ومرهقة جدا في حد ذاتها، وبيكون اللي شاغل تفكيرك ساعتها هو ازاي هتجمع ميزانية شراء البيت اللي اختارته، ده غير كمان حالة الارتباك اللي ممكن تمر بيها واللي ممكن تخليك متفكرش في بعض المصاريف الخفية اللي مكنتش حاسب لها أي حساب.

فأنت لما بتيجي تشتري بيت الأمر مبيوقفش بس على فلوس التعاقد ولكن كمان في بعض المصاريف الخفية اللي لازم تاخد بالك منها خاصة لو كنت بتشتري بيت لأول مرة، ومن أمثلة المصاريف الخفية عند شراء شقتك أو بيتك هي:

رسوم معاينة العقار

قرار شراء البيت بيبقى عامل زي ما بتروح تشتري عربية وتجيب ميكانيكي معاك عشان يعاينها، فمهم جدا قبل ما تمضي عقد البيت اللي عاجبك تحاول تجيب مهندس أو خبير يعاين البيت من ناحية الأساس بتاعه والسباكة والكهرباء.. وإلخ، طبعا الشخص ده ممكن يكلفك بعض الفلوس في سبيل معاينة البيت ولازم تكون حاطط ده في اعتبارك.

مصاريف الصيانة

بعد معاينة البيت ومعرفتك بمميزاته وعيوبه وكل المناطق اللي محتاجة صيانة أو تجديد، لازم بعد كده تحط خطة عشان تخلص كل أعمال الصيانة اللي هتعملها قبل ما تنقل البيت وخاصة لو كانت الصيانة دي متعلقة بالسباكة أو الكهرباء والصرف الصحي والغاز، وإذا لو كان فيه تلف في الأرضيات أو الجدران، أو لو كان البيت أصلا جديد ولسه مش متشطب، كل الكلام ده هيحتاج منك ميزانية مفصلة لكل عنصر ولازم تعرف هتكلفك قد ايه بعد ما تدفع فلوس البيت.

عمولة السمسار

في كتير من الأحيان بيلجأ الناس للسماسرة عشان يساعدوهم في عملية شراء البيت، وطبعا السمسار ده هيكون له نسبة مئوية من عملية البيع دي، فقبل ما تقرر إنك تستعين بسمسار عقاري لازم تتأكد كويس إنك عارف ومتفق على قيمة العمولة اللي هياخدها قبل ما تاخد أي خطوة في عملية الشراء عشان ميتمش استغلالك أو النصب عليك.

مصاريف الشهر العقاري

عشان تسجل بيتك في الشهر العقاري فأنت محتاج تعرف إنك هتدفع مصاريف انتقال وتأشيرة إثبات تاريخ ورسوم خاصة بالأعمال المساحية، وخد بالك إن في ناس وانت بتشتري البيت منهم ممكن يتفقوا معاك على إن يتحط في العقد سعر أقل من اللي هتدفعه، وده في محاولة لإقناعك إن الشهر العقاري بياخد نسبة من قيمة التعاقد، والكلام ده مش صحيح ولكن في الحقيقة هما بيعملوا كده في محاولة منهم للتهرب من الضرائب.

تكاليف النقل

تكاليف النقل ممكن تلاقيها بتكلفك مبلغ كبير خاصة لو كنت بتنقل لبيت جديد لأنك هتكون محتاج تنقل كل ممتلكاتك القديمة بالإضافة كمان لأي حاجة جديدة هتشتريها، والتكلفة دي هتزيد كمان كل ما كان البيت اللي اشتريته بعيد عن مكان سكنك القديم.

في النهاية كل المصاريف دي لازم تكون من البداية حاطط لها ميزانية محددة ومتحاولش تخرج عنها، عشان متلاقيش نفسك وقفت في نص الطريق ومش عارف تكمل في عملية انتقالك وسكنك في البيت اللي اشتريته.

 

المؤشر للتطوير العقاري