news

خطوات بيع العقار 

كصاحب عقار ممكن يجي عليك وقت وتقرر تبيعه، وده لأسباب كتير ممكن تكون حابب تنقل لمنطقة تانية أو محتاج فلوسه لحاجات مهمة أو لو كنت أصلا شاريه بهدف الاستثمار فبيبقى أكيد هدفك النهائي هو إن المبني الأسمنت اللي انت حطيت فيه فلوسك تبيعه ويتحول في الآخر لمبلغ مالي.

عملية بيع العقارات ممكن تكون شيء صعب جدا خاصة لو كان سوق العقارات مش عليه إقبال أو لو كنت بتبيع عقارك في موسم غير مواسم البيع والشراء، وطبعا انت بتبقى عايز تحقق مكسب وفي نفس الوقت ميتمش الإخلال بقيمة عقارك أو تقلل من نسبة الربح اللي كنت محددها.

النهاردة هنقولك على مجموعة نصايح ممكن تساعدك في بيع عقارك بالسعر المناسب له وفي أسرع وقت ممكن:

  • التصوير: العقار زيه زي أي منتج تاني عايز تبيعه، في ناس كتير بتحب قبل ما تشتري أي عقار إنها تشوف صوره الأول، عشان كده اهتم بتصوير العقار الخاص بيك بطريقة واضحة وجذابة تعرض لكل المرافق والإمكانيات الموجودة فيه.

 

  • الإصلاحات: لازم قبل ما تقرر تعرض عقارك للبيع إنك تفحصه بشكل شامل وتدور على العيوب اللي فيه، مفيش مشكلة من استخدام دهان أو ورق حائط جديد، ولو كان مرفق بالمنزل حديقة قوم بصيانتها، وحط في بالك إن لو في أي مشاكل حتى لو بسيطة ممكن تأثر على تمن العقار فمتسبش مثلا أي شباك مكسور وحافظ دايما على نظافة العقار من أي أتربة أو روائح مش حلوة.

 

  • طريقة العرض: تركك لبعض قطع الأثاث في المنزل ده ممكن يساعد المشتري على تخيل شكل البيت وهو مفروش، فتجنب عرض البيت وهو خالي من أي أثاث وفي المقابل متحاولش تسيب الديكورات أو قطع الأثاث اللي بتعكس ذوقك الشخصي واللي ممكن متكونش مألوفة لغيرك من المشتريين، كمان إذا كنت بتربي حيوانات في المكان حاول تبعدهم عن المنزل وانت بتعرض العقار عشان المشتريين يحسوا بالراحة فيه.

 

  • التسعير: غالبا عملية تقييم سعر العقار بتتم بناء على وجهة نظر صاحب العقار وده بيعمل اختلاف بين السعر اللي عارضه والرقم اللي المشتري عايز يشتري العقار بيه، وعشان تتفادى إنك تقيم عقارك بسعر مبالغ فيه في مجموعة اعتبارات هتساعدك في تحديد قيمة عقارك بطريقة منطقية:
  • مكان وجود العقار ومتوسط الأسعار في المنطقة اللي انت فيها.
  • مواصفات العقار من مساحة وتاريخ البناء وتقسيمته من جوه والواجهة بتاعته.
  • الخدمات الموجودة في العقار سواء من كهرباء ومياه وغاز وكمان خدمات الأسانسير والأمن والنظافة.
  • الخدمات العامة الموجودة بجوار العقار من مستشفيات ومدارس وغيرها.
  • معلومات واضحة ودقيقة عن العقار: لازم وانت بتعرض العقار بتاعك للبيع تحط كل المعلومات بشكل دقيق ولو كان العقار فيه مشاكل أو أعطال معينة لازم تقولها بصراحة لأي مشتري بتعرض عليه العقار، فتعاملك بشفافية هيخلق ثقة بينك وبين المشتري هتخليه متمشك بشراء العقار وهتسهل عملية التفاوض، أما لو حاولت تخفي المشاكل دي فانت هتخلي سمعتك كبائع سيئة.

 الوسيلة الإعلانية: كتير من الناس حاليا بقت تعرض أي عقار عايزة تبيعه على الإنترنت وخاصة في المواقع العقارية، وبيكون من الأفضل إنك تستخدم صور جذابة ووصف تفصيلي بكل المعلومات والمميزات الخاصة بالعقار من مساحة وعدد طوابق وعدد غرف وكمان تحدد السعر ومعلومات للتواصل معاك، المعلومات التفصيلية دي هتميز إعلانك عن بقية إعلانات العقارات التانية المعروضة للبيع.

 

المؤشر للتطوير العقاري