news

"الشقة" الكلمة دي كانت ومازالت مصدر رعب لكتير من الشباب اللي بيفكروا يتجوزوا لأنها علشان تبقى موجودة لازم يكون معاهم فلوس كتير وده معناه سنوات من العمل والتحويش والانتظار، لكن في الحقيقة رحلة شراء الشقة دي على قد ما هي متعبة ومرهقة على قد ما ممكن تكون ممتعة ومثيرة لأنها هتنقلك خبرات جديدة وهتساعدك على إن تفكيرك يكون منظم بعد كده طول حياتك.

علشان كده قررنا نكلمكم عن أهم النقاط اللي لازم تاخدوا بالكم منها علشان تقدروا تشتروا أحسن شقة مناسبة ليكم، وهي:

  • الميزانية:

حدد المبلغ اللي أنت مخصصه لشقة المستقبل، وطريقة الدفع الأنسب ليك يعني أحسنلك تدفع كاش ولا تقسيط، ولو هتقسط لازم تبقى عارف إنه ما ينفعش تدفع أكتر من 30% من دخلك الشهري على السكن لأنه هيكون عندك التزامات تانية سواء متعلقة بالجواز أو لا مطلوبة منك.

  • موقع الشقة:

اختيار موقع الشقة بيساعدك على إن خياراتك تكون محددة أكتر وبالتالي بتقلل من حيرتك وترددك، وخلينا نقول إن تحديد الموقع المناسب بيختلف وفقًا لأولويات كل شخص يعني مثلًا في ناس بتحب بيتها يكون جمب شغلها لأن ده هيساعدها على توفير وقتها ومصاريف المواصلات أو البنزين، والبعض بيختار على أساس المستوى الاجتماعي والاقتصادي والثقافي.

وفي ناس تانية بيفرق معاها إنها تسكن في مكان هادي بعيد عن الزحمة وبالتالي هتركز بحثها في المدن الجديدة، وعلى العكس في شخصيات بتفضل تسكن في الأحياء الحيوية والأماكن القريبة من أهلها ودول هيفضلوا يسكنوا في أحياء العاصمة القديمة، وأي ما كانت تفضيلاتك ابدأ دور على المناطق اللي بينطبق عليها المواصفات دي وفي نفس الوقت سعر المتر فيها هيناسب الميزانية وطريقة الدفع اللي تناسبك.

  • الخدمات المتوفرة في المنطقة:

بعد ما تختار المنطقة المناسبة لتفضيلاتك وفلوسك لازم تتأكد إن المنطقة فيها الخدمات الأساسية اللي بيحتاجها أي ساكن زي المواصلات، والحضانات، والمدارس، والمستشفيات، والأسواق التجارية، ودور العبادة، والنوادي الرياضية، وساحات انتظار العربيات، وأماكن الترفيه، ومهم كمان إنها تكون بمستوى جيد وقابل إنه يتحسن علشان تضمن إن أولادك هيكبروا في مكان كويس ومريح بالنسبالهم.

  • العمارة:

لما تيجي تختار العمارة لازم تتأكد من إنها متسجلة في الشهر العقاري أو قابلة للتسجيل، وإنها مرخصة وليها أوراق قانونية ومش بتخالف اشتراطات البناء وبالذات شرط الارتفاع والمناور، ومتوصل ليها جميع المرافق زي الكهرباء والمياه والصرف والغاز، ومن الأفضل كمان إنه يكون في بواب أو حارس للعمارة ومجلس إدارة علشان يكون في اهتمام بأعمال الصيانة الدورية على المدى القصير والبعيد.

ولو أنت مهتم إنك تمتلك جزء من الأرض بتاعة العمارة بجانب الشقة فلازم تتأكد من وجود البند ده في العقد، ولو عايز تسكن في برج فمهم تاخد بالك من وجود أسانسيرين على الأقل وسلمين ومعدات لإطفاء الحريق في كل دور.

  • مواصفات الشقة:

المواصفات المثالية للشقة بتختلف من شخص للتاني بس نقدر نقول إنه لو ميزانيتك محدودة ومقرر تأجل موضوع الخلفة ممكن تختار شقق مساحتها أقل، أما لو معاك سيولة يبقى الأفضل إنك تجيب من الأول شقة مساحتها أكبر يعني من 100 إلى 130 متر مربع.

وفيما يتعلق بموقع الشقة هنلاقي إن الأفضل إنها تكون في المنتصف ومتكونش في الأدوار العالية أو في الدور الأرضي، وفي حال تفضيلك ليهم لازم تتأكد إن في عزل للماء والحرارة بالسطح ده لو أنت في أخر دور وإن مواسير الصرف مش بتمر من أسفل الشقة لو هتختار الأرضي.

كمان في نقاط مهمة لازم تبص عليها لما تيجي تعاين الشقة ،واللي يفضل إنك تشوفها على الطبيعة مرة الصبح ومرة بليل، من بينها إن الشمس والإضاءة الطبيعية تكون بتدخلها لأن ده مفيد من الناحية الصحية والنفسية، وإن سمك الحوائط ميكونش أقل من 25 سم علشان تتجنب وصول أي دوشة أو أصوات سواء من الشارع أو الجيران ده غير إنها بتفرق في الحر والبرد كمان.

برضه لازم إن تصميم الشقة يكون بيراعي الخصوصية وميكونش فيه إهدار كبير في المساحات، ومهم جدًا إن نسبة المرافق العامة (المناور، الخ..) متزدش عن 15% من مساحة الشقة.

  • التشطيب:

لو معاك سيولة مالية تسمح لك بشراء شقة متشطبة اعمل ده، لكن لو ده مش متاح يبقى الأفضل إنك تختار شقة مساحتها صغيرة على الطوب الأحمر لأن ميزانية تشطيبها هتكون أقل خاصة لو استعنت كمان بصنايعية كويسيين وموثوق فيهم.

المؤشر للتطوير العقاري